» » Гузаль Ситдыкова. ҠАЙТЫУ

Гузаль Ситдыкова. ҠАЙТЫУ

Опубликовано: 10-12-2016, 12:52 | Категория: Шиғри минуттар
ҠАЙТЫУ
(юл фажиғәһендә үлемдән ҡалғандан һуң яҙылған шиғыр)

Йәшәү менән үлем араһында
Йән талашып иҫһеҙ ятҡанда
Баш осома килде бер фәрештә...
Рәхәт ине уға баҡҡанда.
Һыҙланыу ҙа, ҡайғылар ҙа үткән,
Ниндәйҙер көс гүйә ялмаған,
Кәрәк түгел бер ни... Онотолған,
Борсолорлоҡ уй ҙа ҡалмаған.
- Яҙыҡтарың бармы?
- Әллә, - тинем, -
Бер нәмә лә төшмәй хәтергә...
- Иҫлә... Иҫлә... Хәтереңә төшкәс
Төҙәтергә шуны ҡайт ергә.
- Әллә, - тинем йәнә...
Ысынлап та
Туҡтап ҡалған кеүек туң мейем.
Мин - бушлыҡта...
Бар уйҙарҙан азат,
Йәнһеҙ ҡурсаҡ...
Уға ни тием?!
- Бурысың бар - нәҫел дауам итеү,
Алланан ул балаң - аманат,
Тапҡан балаң – баҡҡан балаң булһын,
Килтермәҫлек булһын яманат.
...Аһ, һүҙҙәре ҡапыл осҡон булып
Йәнһеҙ тәнгә инеп уятты,
Балаларым...
Миңә рәхәт, имеш...
Онотҡанмын даһа...
Оятһыҙ.
-Балаларым...
Улар кескәй әле,
Ҡала күрмәһендәр үгәйгә...
Ҡайтам! Ҡайтам!
Әрнеү-һыҙлауҙарға
Яраланған тәнем, түҙ әйҙә!
Аһ...
Китеүе еңел булған да ул.
Мең ғазаптар аша - ҡайтыуы,
Мәйетемдең таш ҡалыптай булып
Индермәйсә мине ятыуы...
Балам хаҡы шулай түләнәлер,
Бирелмәйҙер ғүмер һис бушҡа.
Ҡайтам! Ҡайтам!
Борсоу, ҡайғыларға,
Һыҙланыуҙар тулы тормошҡа.
Һынау үтә торған тормошҡа...
-Ҡайт, ҡайт әйҙә, - тине лә фәрештә
Ахирәткә ҡойма шыуҙырҙы.
... Тәүге тапҡыр ергә мине - әсәм,
Икенсегә - балам тыуҙырҙы.

© Гүзәл Ситдиҡова
Официальный информационный портал органов государственной власти Республики Башкортостан  Официальный информационный портал Государственного Собрания - Курултая Республики Башкортостан  Официальный портал Правительства РБ  Башинформ